|
< بانتهاء ديربي الكويت بين العربي والقادسية انقسم الجمهور العرباوي الى ثلاثة اقسام ناس سنت سكاكينها على احد نجوم كلاسيكو الكويت وهو الحكم الدولي ثامر العنزي اللي اتهموه ببعض القرارات التي اثارت اللاعبين ولعل ابرزها ضربتا الجزاء اللتين احتسبهما الحكم مع انها صح بشهادة اغلب المحللين .. ومو بس هذا ألا اجمعوا على ادارته الجيدة للمباراة.
واللي ما تهجم على الحكم حط حرته بنهير الشمري على ألعابه الاستعراضية بالمبارة اللي ما اعجبت البعض مع انها حق مشروع للاعب خلال سير المباراة ولسان حالهم ليش يسوى هالحركات ! ليش مايرحم ضعف فريقنا وقلت حيلته .. واما القسم الثالث فحمل رئيس النادي جمال الكاظمي مسؤولية الخسارة وانه هو السبب بضعف مستوى اللاعبين المحترفين لانه هو اللي جايبهم مع انهم من اختيار المدرب وقبل مانسي هل المجلس بس ابوطلال ؟ .. وين العشره الباجيين ليش مايقومون بأدوارهم ويجيبون لاعبين اجانب حالهم حال الرئيس لانهم اعرف بالبير وغطاه اللي ييجي من الهيئة؟ .. ياجماعة الخير ارحموا جماهيركم الزعيم رايح فيها وانتم ماعندكم غير التصاريح اللي ماتوكل خبز .. عفيه قوموا بدوركم واللي مافيه شدة ينسحب بهدوء مع الوعد ان الناس راح تذكره بالخير.
****
< الجهراء بعد الحل تصريحات اعضائه نارية وكلها تندرج وراء كلمة سوف ومنها كم سوف ابيك تقراها عزيزي القارئ .. سوف يجلبون محترف خامس للفريق ويبون يجيبون مدرب لياقة بدنية ويبون يسوون صيانة لاعمدة الانارة بالنادي ويبون يجددون فرش صالات الملاكمة والمبارزة ويبون يدفعون رواتب وايجارات ويبون يستأجرون سيارات لنقل المدربين والمحترفين وكل هذا بالسلفة اللي راح يطلبونها من الهيئة اللي جني سمعت عنها انها خمسين الف دينار.. والله غريب امرهم الظاهر ان الجماعة نسوا انهم محلل مو اكثر يعني اليوم او بعد كم يوم ينتهي دورهم يعني مع نهاية الازمة الرياضية .. ياجماعة الربع وشلكم بالدوخة وقيل وقال وكأني ماني ايه والدنيا ربيع وقفلوا على كل المواضيع سلكوا الامور وخلوها تمشي لين يطيح هواء عجة طنخر .
****
< اليوم ثالث يوم بعد انتهاء كلاسيكو الكويت .. اشوف اهل لجنة المسابقات مالهم اي حس اوخبر صغير من سطر او من سطرين بأي جريدة محلية او حتى الشريط الاخباري التلفزيوني .. ما أدري هم ماشافوا المبارة او ان الامور اللي حصلت اثناء سير المباراة وانتهائها عاجبتهم وشي عادي بنظرهم .. ان كان تفكيرهم بالشيء الاخير عزالله نبشر بالخير الكثير وراح تكثر الاعتراضات والتحذف مدام الامور تطوف بهالسهولة .. واللا يمكن الجماعة انتهى دورهم بعد اصدارهم للقانون ابو فلوس اللي صدروه قبل فترة وناموا من وراه متحرين الفكه من وراء مطب قبولهم أمور الانتقالية المتعوكس!
ألوو اخير: «بكره بتبين القرعة من ام الشعر»
aloooyaomm@hotmail.com
عالم اليوم
|
