|
أنا محمد اديلم اذا كنتوا نسيتوني، لاعب النصر ايام خالد الشليمي وحمد شريدة واخوه صالح اللي اذا مسك الكورة ما يلعب باص، ايام محمد مجاهد اللي يركض بالملعب حتى اليوم الثاني من المباراة، انا مدافع العنابي اللي ضمني المدرب البرازيلي سكولاري فيليب للازرق في خليجي 10 في الكويت 1990، حتى المدرب لوبانوفسكي كان يلعبني أساسي أخاف انكم نسيتوني.
انا اول لاعب طالب بحرية انتقال اللاعبين بين الأندية لاننا هواة وزعل علي نادييّ النصر ولكن انا مازعلت عليهم، انا يا العرباوية اللي لعب معاكم عدة مواسم، اذكركم ولا نسيتوا، تذكرون الهدف الذهبي اللي سجلته برأسي في مرمى حارس التضامن حمد عبدالصاحب وفزنا بكأس سمو الامير موسم 1999/2000 اذا كنتوا نسيتوني اذكركم، وين الجماهير عني في مهرجان اعتزالي في مباراة العربي والكويت، بس تدرون انا مسامحكم لان كل واحد قام يعتزل ويخرب على اللي يستحقون التكريم، انا مسامحكم وهذي «بوسة» مني لكل من حضر الملعب.
شد حيلك يا الأخضر واللي راح راح ونبي الكاس منك.
الانباء
|
