|
في بداية الألفينات آخر فترات الامجاد العرباوية، اتذكر اغنية من كلمات وألحان الجمهور العرباوي تقول: بسنا بطولات... بسنا بطولات، وفعلا كانت مطلع الشؤم علينا!، هوسنا فيها موسم، موسمين، ومن عقبها عينك ما تشوف إلا النور، بدأ مسلسل اهدار البطولات وأهمها الدوري الذي لم نلمس درعه منذ ثماني سنوات (وياخوفي من التاسعة)!!.
كتبت مقالا سابقا في جريدة «الراي» بعنوان «الزعامة في خطر»، لم ينل حظه من الاهتمام لدى الادارة العرباوية «الموقرة» على الرغم من انه نال استحسان كل من قرأه من الجماهير الكويتية عامة والعرباوية خاصة!!
والله ما كتبت ذلك المقال ولا هذا إلا لأجل النادي العربي الذي دفع ومازال يدفع ضريبة خلافات واتفاقات لا شأن له بها! لم أبحث عن شهرة ولا مال، نبي بس نادينا يتسنّع!!.
كنت ومازالت كمشجع عرباوي من المحبين والمؤيدين لرئيس النادي جمال الكاظمي، ولكن يبدو انه طيب اكثر من اللزوم، والدليل انه بشكل خاص والادارة بشكل عام، لا يتغطون من اخطائهم ولا يستفيدون من اخطاء الغير، واتضح هذا في كابو ومحترفي كابو (السكة) الذين حاولوا ان يمشي سوقهم عند العربي وقد نجحوا في ذلك، فيابو طلال اوجه الكلام والنصح اليك لانك انت من يدفع، ومن يخسر ويحط من جيبه على النادي لا احد غيرك!.. والله حرام حلالك ودم قلبك يروح على الفاضي، يارجل ما اتعظتوا من دراغان ومحترفي دراغان عيال خالته وقرايبه؟!!
ابو طلال، المدرب اللي يقول لكم: خلوا اختيار المحترفين عليّ، ويروح يجيب لكم من جنسيته كل اللواعيب المحترفين، لأ.. وعيال خالته بعد!.. هذا ما يبي يفودكم، هذا يبي يفودهم!! وين عقولكم يا جماعة؟!!
وانا لي عتب ايضا في هذا الموضوع على ابو محمد/ سامي الحشاش، النجم الكروي الدولي الخلوق الذي حببنا بالكورة هو وجيله الذهبي، شلون تطوفه مثل هالشغلات؟!... وين النقاذ اللي يقولون سلموا المناصب الرياضية للواعيب الجيل الذهبي وشوفوا الانجازات وترقبوا عودتها.
وين يا بومحمد؟! انا كمشجع عرباوي ما لي إلا هالملاحظة عليك، شلون يطوفك اختيار المحترفين، انت ما لك راي فيهم وفي اختيارهم؟!! اما ايجابياتك فلست بصدد ذكرها، فأنت مو مقصر بشهادة اللاعبين الذي خذل اغلبهم طموحاتك وطموحاتنا كعرباويين!!
يا إدارة عموما... ويا بو طلال خصوصا انتم اختاروا المحترفين وقدموهم للمدرب، لا تدعوا مدربا يختار محترفي الفريق، واذا غركم كابو تراهو مدرب عادي (لا هو فوق ولا تحت) والله يعز لاعبي النصر اللي شايلينه وشوفوهم شمسوين بدونه الحين مع المدرب علي الشمري، مبدعين!،، جيبوا له محترفين باختياركم واعتمدوا قناعاته فيهم، لكن اذا قلت له: جيب محترفين على كيفك (هو ولّا اي مدرب غيره) راح يجيب جماعته ويوهق الفريق، لانه حاس انكم عالة عليه وبدونه انتم ولا شيء، واي شيء راح يسويه راح ترضون فيه... حسسوه انكم «هنا»!
المحترفون فشلة... فشلة، واللاعبون المحليون افشل إلا من رحم ربك!، بهالمجموعة هذي وهالخليط هذا والله ما راح تاخذون بطولات، (وبالذات دوري)... بسنا خسارات... بسنا!!.
اغلب لاعبينا والله بالكاد يصلحون للعب مع اندية صغيرة، والله مع شدييييد احترامي لهم ما هم طموح العربي ولا جماهيره، استثني منهم (غير جيل احمد موسى وعلي عمر... إلخ) خالد الرشيدي وعلي مقصيد - مبارك البلوشي - محمد غانم - احمد الرشيدي - عبدالله الشمالي - فهد الحشاش - عبدالعزيز السليمي - محمد جراغ وخالد خلف!.
ولم انس احدا... لم انس احدا، فتخيلوا اكبر ناد بالكويت انجازا وجماهيرية لايملك اكثر من عشرة لاعبين!، وغيره من الاندية المنافسة وحتى بعض غير المنافسة لديها عشرون وثلاثون لاعبا بمستوى فني متميز واحد!!
ارجو ألا يطلع لي احد ويتفلسف على راسي ويقول لي: من حضرتك عشان توجه لنا نصايح وتتكلم معانا بهالطريقة وتنتقدنا،، وشنو انته، ومنو انته؟!! لأني سأرد عليه واقول له: انا عرباوي... عرباااوي، أدفع فلوس حق التذكرة منذ ربع قرن ويزيد لمشاهدة فريقي، ومستعد اتبرع له اذا سويتوا له تبرع جماهيري، وانا مشجع له قبل ما تمسكون مناصبكم هذي وتعورون قلوبنا بمشاكلكم اللي عمت على النادي (بغض النظر عن المصيب من المخطئ... فأنا مشجع عرباوي يريد نتائج وانجازات ورؤية فريقه على منصات التتويج، وانتم المسؤولون عن كل ذلك!... وهذا ليس مرادي فقط، بل مراد كل العرباويين).
بس خلاص... مالي خلق اكمل... قلبي قام يعورني!!.
فقد اسمعت اذا ناديت حيا...!!
|
