|
خاص - قمنا عصر اليوم في جولة لتمرين الفريق الاول للنادي العربي للاطمئنان على استعدادات الفريق للقاء التضامن غداً الثلاثاء ضمن دور الـ8 من مسابقة كأس سمو أمير البلاد حفظه ورعاه، وقد إلتقينا عدد من اللاعبين والمسؤولين عن الفريق:
مبارك البلوشي: المباراة صعبة ولكن أتوقعها عرباوية !
طبعاً مباراتنا مع التضامن مباراة صعبة مثل ما الكل عارف بأننا أخرجنا التضامن من مسابقة كأس سمو ولي العهد، يعني شي أكيد راح يدخلون اللقاء بطابع ثأري وأحنا على حاسبين حساب هالشيء، وعلى رغم من أننا ننقص عنصرين مهمين علي مقصيد وخالد عبدالقدوس لكن البركة في البقية إن شاء الله، وعن توقعات للمباراة طبعاً مباراة صعبة ولكن أتوقعها عرباوية إن شاء الله.
علي حاجيه: هدفنا وعيونا على الكأسين !
طبعاً إن شاء الله فريقنا مستعد للمباراة وإستعداداتنا مثل أي مباراة وطبعاً ركزنا على اللاعبين أن ينسون الفوز في بطولة كأس سمو ولي العهد وحرصنا عليهم بأن فريق التضامن فريق أبداً مو سهل ولا يستهان فيه، وإن شاء الله راح تكون النتيجة من صالحنا.
أمام بخصوص الإستهانة في فريق التضامن طبعاً هالشيء مستبعد لأن اللاعبين أحنا عاهدونا و واعدونا من بعد نهاية الدوري و الخرافي بأنهم يبون الكأسين، والكأس الأول والحمدلله يبنا وباقي الكأس الثاني إن شاء الله، ولو تلاحظ تقدر تشوف الإصرار والعزيمة في عيون اللاعبين والله يوفقنا إن شاء الله، وأتوقع النتيجة 2/1 للعربي وبيسجل محمد جراغ وفراس الخطيب بإذن الله.
فاضل مطر: الحظ عامل مؤثر في هذه المباراة !
طبعاً مباراتنا مع التضامن تختلف نهائياً عن المباريات الأخرى في بطولة كأس سمو ولي العهد لأن بطولة سمو ولي العهد أقيمت في نظام المجموعات (على شكل دوري) ولكن مباراتنا أمام التضامن راح تكون بنظام خروج المغلوب يعني تحتاج حظ في مثل هذه المباريات لأن ممكن تمسك المباراة من بدايتها لي نهايتها وما تتوفق في ترجمة الفرص وتوصل لي ضربات الجزاء وما تتوفق وكلنا شفنا مباراة السالمية واليرموك الأخيرة وهي أكبر شاهد على ذلك، ولاعبينا إن شاء الله على قدر المسؤولية وأحنا كلنا ثقة فيهم، وإن شاء الله المباراة عرباوية لأن أحنا دوم متفائلين.
منير: العربي سيفوز 2/0 !
باجر العربي راح يفوز إن شاء الله 2/0 وراح يسجل فراس الخطيب وجراح الزهير
الرجل^الأخضر: شوف منير جدام Mohammed إذا العربي فازو باجر 2/0 لك مني هدية
منير: مشكور
حسين الموسوي: هذا العربي ... !
طبعاً استعدادنا لبطولة كأس الأمير مثل استعدادنا لكأس سمو ولي العهد وإن شاء الله نوعد الجمهور بأن راح نكمل على نفس الروح والمستوى إن شاء الله، وطبعاً أحنا الحين طوينا صفحة كأس سمو ولي العهد وفرحنا فيه في يومها وأحنا الحين كل تركيزنا على كأس الأمير، وطبعاً المباراة راح تكون ثأرية للتضامن بشكل أكبر ولكن أحنا جاهزين وإن شاء الله خير وفي حال فونا هالشيء راح يعطينا دافع أكبر لتحقيق اللقب صحيح أن فزنا راح نلاقي فريق أكبر وأقوى ولكن هذا العربي ، وأتوقع المباراة عرباوية 2/0 إن شاء الله وفراس الخطيب راح يسجل القولين.
عبدالله الشمالي: جاهزين للمباراة !
الحمدلله الفريق جاهز إن شاء الله لمباراة التضامن صحيح أن عندنا نقص كذا لاعب ولكن إن شاء الله البركة في الموجودين، وأحنا كلاعبين إن شاء الله كلنا إصرار وعزيمة لتحقيق الإنتصار في المباراة وكل تركيزنا راح يكون منصب في المباراة و وجوه اللاعبين كلها تبشر بالخير والجميع متفائل، وعن نتيجة المباراة مو مهم النتيجة المهم نتأهل.
طلال خلفان: أجلنا الفرح إلى ما بعد كأس الأمير !
أحنا على أتم الإستعداد للعبة التضامن وأحنا كلاعبين حاطين في بالنا الفوز إن شاء الله، أحنا كان في ودنا نفرح بشكل أكبر في بطولة كأس ولي العهد ولكن أحنا أجلنا الأفراح إن شاء الله إلى ما بعد كأس الأمير إن شاء الله، وأحنا كلاعبين نعتبر لقاء التضامن مثل لقاء كاظمة النهائي لأنها في نفس الأهمية، والنتيجة طبعاً علم الغيب ولكن أتوقع أن النتيجة راح تكون 2/0 للأخضر.
حسين الغريب: حاطين في بالنا البطولة !
في البداية أول شي أحب أبارك لجمهور النادي العربي الفوز في بطولة كأس سمو ولي العهد، طبعاً أحنا الحين خلاص نسينا كأس ولي العهد وداشين الحين كأس الأمير وأحنا حاطين في بالنا أن ناخذ كأس الأمير مو معناته أن ناخذ بطولة كأس ولي العهد خلاص لا بالعكس نبي كأس الأمير بعد !
وأستعدادتنا وايد جيدة وأنتوا شايفين شلون اللاعبين كلهم ملتزمين وياين كلهم التمرين، وأحنا ندري أن التضامن داشين المباراة يبونا لأن طلعناهم من كأس ولي العهد ولكن أحنا أيضا نبيهم !
وأحنا كلاعبين حاطين في بالنا أن التضامن ياي يبي يثأر منا لأن طلعناه من ولي العهد، ولكن أحنا كفريق ولاعبين نبي البطولة بغض النظر عن الفريق ألي راح نواجهه، وعن النتيجة أتوقعها إن شاء الله 2/0 للعربي وخالد خلف يحط قول وأنا أحط الثاني
يوسف الثويني: إذا التضامن يبون المباراة فأحنا نبيها أكثر !
الحمدلله الفريق أخذ وضعه وتأقلمنا مع بعض مثل ما يقولون الخليط بين عناصر الخبرة والعناصر الشابة والحمدلله قدمنا مع بعض مستويات وايد أفضل من المستويات ألي قدمناها في السابق وعسى الله يوفقنا باجر جدام التضامن ونتأهل للدور قبل النهائي ومن ثم للنهائي ونييب الكأس بإذن الله.
وأحنا عندنا علم بأن التضامن ياي وبيرمي بكل ثقله لأن يبي المباراة وهاذي آخر مسابقة في الموسم ولكن إذا التضامن يبون المباراة فالعربي أيضاً يبونها أكثر والملعب إن شاء الله راح يكون الفيصل، وأتوقع المباراة لنا إن شاء الله 2/0 خالد خلف وفراس الخطيب.
أحمد مطر: حسين الموسوي راح يسجل قولين !
مباراتنا مع التضامن صعبة لأن التضامن يبي يثأر وأحنا نبي الفوز، ولكن إن شاء الله إذا ظهرنا في نفس المستوى والروح ألي ظهرنا عليه في كأس ولي العهد أنا ما أتوقع أن أي فريق يقدر يفوز علينا ! وأحنا حاسبين إن شاء الله حساب التضامن، وعن نتيجة المباراة أتوقعها 2/0 للعربي والهدفين راح يسجلهم حسين الموسوي.
فهد الفرحان: نتمنى مؤازرة الجمهور لنا !
طبعاً لقاءنا مع التضامن لقاء صعب ولا يقبل القسمة على 2 لأن الفريقين ما عندهم شي يخسرونه كون هاذي آخر بطولة في الموسم التضامن يبي يعمل شيء قبل نهاية الموسم، وأحنا طبعاً نبي نحافظ على لقبنا ألي حققناه في آخر عامين، فريقنا جاهز ولله الحمد وكل الظروف مهيئة لتحقيق الفوز إن شاء الله، وأتمنى حضور الجمهور لمؤازرتنا مثل ما حضروا في النهائي وقبل النهائي إن شاء الله.
|
