|
خاص - كتبه محمد حسن: كان لموقع الجمهور العرباوي حضور في التدريب الأخير لفريق النادي العربي لكرة القدم قبل لقاء السالميه في قبل نهائي كاس الأمير , وقد خرجنا ببعض اللقاءات مع اللاعبين .
أحمد عبدالغفور: هدفنا الوصول للنهائي !
طبعاً أستعدادنا للمباراة أكثر من ممتاز خاصة وأن احنا معسكرين داخلياً في فندق الراية، وطبعاً هدفنا الوصول للمباراة النهائية وكلنا اصرار وعزيمة على ذلك خاصة وان احنا كلاعبين صغار نطمح لتحقيق الانجازات والالقاب، وان شاء الله الفوز عرباوي.
مساعد عبدالله: احساسي يقول 2/0 العربي !
الحمدلله استعداداتنا ممتازة خاصة وان اخذنا راحة يومين وعسكرنا في فندق الراية، وربعنا الحمدلله جاهزين للمباراة وفريق السالمية خصم مو سهل بس عندي احساس وتوقع بأن ان شاء الله الفوز عرباوي 2/0.
محمود اليتيم (بو وحيد): خايف من المباراة !
ذكر (بو وحيد) محمود اليتيم احد رواد النادي القدامى بأنه خايف من المباراة وقاعد يحاتي ولكن ان شاء الله الفوز عرباوي
خالد عبدالقدوس: النتيجة اهم شيء !
طبعاً استعداداتنا مثل اي مباراة سابقة ولكن مثل ما تعرفون ان في لقاءنا امام السالمية اهم شيء النتيجة يعني ما ينفع ان نقدم مستوى ونخسر لا سمح الله، يعني النتيجة أهم شيء خاصة وان المباراة خروج مغلوب يعني ماكو أي مجال للتعويض فالفائز مولود والخاسر مفقود، وشي أكيد أن المسؤولية زادت علينا بعد أحرازنا لبطولة كأس سمو ولي العهد يعني أحنا لو داشين المباراة ومو محققين كأس سمو ولي العهد جن ممكن الناس تعذرنا شوي لأن فريق شاب ويبيله وقت ولكن الحين لأ خلاص لأن احنا اثبتنا للناس بالفريق هذا وبالعناصر الصغيرة الموجودة ان قادرين نحقق بطولة، وعن النتيجة ان شاء الله راح تكون عرباوية.
خالد خلف: نبي الكأس !
طبعاً أحنا ما وصلنا إلى هذا الدور إلا واحنا طموحنا تحقيق الكأس مو بس الوصول للنهائي ! والشباب ماراح يقصرون مثل ما حققنا كأس ولي العهد هم راح نييب كأس الأمير إن شاء الله، وعن نتيجة المباراة أتوقعها إن شاء الله 3/1 للعربي (أول شي قال 2/0 بعد قال 3/1 )
طلال خلفان: نبي نخلي الفرحة فرحتين !
طبعاً مباراتنا أمام السالمية في الدوري قبل النهائي جداً صعبة ولكن الفريق ولله الحمد جاهز، وإن شاء الله راح نحقق الكأس لنثبت وجودنا لأن احنا اجلنا الفرح في كأس ولي العهد إلى ما بعد الأمير، وإن شاء الله تكون الفرحة فرحتين، وعلى فكرة مشرف الفريق علي حاجيه في المباريات الثلاث الماضية كان يقول نتيجة المباراة قبل لا تبتدي !، وعن توقعاتي للمباراة اتوقعها تمتد لمدة أربعة أشواط ولكن قبل البلنتيات راح نخلصها عرباوي إن شاء الله.
علي مقصيد: أهم شيء نبي تواجد الجمهور !
الحمدلله الجهاز الفني والاداري للفريق الكل واقف معانا حق مباراتنا مع السالمية وان شاء الله ما نقصر في لعبتنا أمام السالمية، أهم شيء نبي تواجد في المباراة وإن شاء الله ماراح نقصر، وعن نتيجة المباراة مو مهم النتيجة المهم نعبر المباراة ونخلصها لصالحنا.
علي حاجيه: الفريق كامل وجاهز
مثل ما قلت لكم من قبل ان اللاعبين يبون المباراة وفي عيونهم الكأس وإن شاء الله ما يخيبون ظن الجمهور، والحمدلله فريقنا جاهز ومافي غيابات، والله يوفق اللاعبين ان شاء الله باجر.
فراس الخطيب: بنحط كل ألي عندنا !
إذا كان نادي السالمية سيدخل المباراة بروح قتالية بعد فوزه الصعب والمستحق على كاظمة، فأحنا إن شاء الله راح ندخل بروح قتالية وعزيمة أكبر وراح نطلع كل ألي عندنا في الملعب أنا وزملائي اللاعبين وماراح نبخل في أي قطرة عرق على الأخضر، وإن شاء الله راح نتلافى الأخطاء ألي صارت في المباراة السابقة أمام التضامن من ضياع فرص واستهتار أمام المرمى وهذه المباراة لها حسابات خاصة إن شاء الله، وأحنا إن شاء الله راح نعمل ألي علينا ونأدي واجبنا على أكمل وجه والنتيجة بيد رب العالمين، وأكثر ما يهمني هو الفوز وليس تسجيل الأهداف.
فهد الفرحان: حسابات مختلفة !
طبعاً مباراتنا مع السالمية في الدور قبل النهائي لها حسابات مختلفة وهي مباراة صعبة ولا تقبل القسم على اثنين لأن الخاسر خلاص راح يودع الموسم بينما الفائز راح يوصل للنهائي، وأكيد فريق نادي السالمية راح يعطي كل ألي عنده لأن ما يبي يطلع من المولد بلا حمص، ولكن إن شاء الله بهمة وعزيمة لاعبين الأخضر أحنا قادرين على تجاوز السالمية والوصول للمباراة النهائية، وأتمنى حضور الجمهور العرباوي المخلص بكثافة مثل ما عودنا في السابق.
|
